Torheimsetra via Bjørnaskarnakkjen

I går var vi på tur igjen, denne gongen frå Hansgjellen på Hundvikfjellet, via Bjørnaskarnakkjen og til Torheimsetra - Torheim. Astrid P sin Anders var så snill å møte oss med bil nedanfor setra, og Astrid og Kari vart med han. Kari henta "spisevogna" på Hansgjellen, og kom og møtte oss andre på Torheim. Da hadde vi hatt ein nydeleg tur bortom tunet til Astrid T sine foreldre, der vi mellom annan meska oss med kirsebær frå nokre bugnande tre. Mmmmm. Det var ein vakker sommarkveld på frodige Torheim, og kaprifollukta låg tung kring oss der vi gjekk i møte med sjåføren vår. "Vi" var denne gongen: Kari, Jorunn, Astrid T, Hilde, Astrid P, Bodil og Herdis. Fleire bilder i albumet.

Maragjølsetra

Turen i dag gjekk til Maragjølsetra. Vi var fem tauser med denne gongen: Kari, Astrid T, Jannicke, Jorunn og Herdis. Været var litt spesielt: tora buldra i bakgrunnen, men ga seg omsider. Regnskura som vanlegvis følger etterpå glimra med sitt fråver, og TPT-turen vart enda ein gong mirakuløst nok gjennomført i utmerka (opphalds)ver! Det var ørlitt kjølegare i lufta enn det har vore dei siste dagane, noko fleire av oss sette pris på. Varmt nok likevel! Vi fekk ein flott tur, og møtte Turlaget på veg ned da vi var oppe ved brua ovafor setra. Dei hadde heller ikkje lete seg skremme av været, heldigvis for både dei og oss. Det er fint der oppe, kan absolutt anbefalast. Fleire bilder i albumet.

Tur til Hornet frå Hamneset

I går (onsdag 23.07.)var TPT på ein flott tur til eit heilt nytt turmål for oss: Hornet ved Hamneset. Deltakarane denne gongen var Jorunn, Kari, Astrid T, Marit og Herdis. Kari hadde vore der for første gong nyleg, og viste veg oppover. Astrid var jo på kjente trakter, ettersom besteforeldra hennar har budd på bruket der turen starta. (Vi var til og med bortom og kikka på hyttetomta hennar på veg ned, med Nordfjords flottast eik!. Her kjem nokre bilder frå den uvanleg fine turen:

Fjellbilde

 

Dei spreke tausene på Eid

Vi er ein gjeng med damer som i fleire år nå har gått kortare og lengre fjellturar i lag. Vi legg minst like stor vekt på det sosiale som trimmen, og har utforma nokre grunnleggande reglar for aktiviteten vår:

Definisjonen av ein TPT-tur er følgande:
-dersom ei eller fleire TPT-damer går frå A til B (og oftast tilbake), er det ein TPT-tur
-dersom du finn ut kvar og når turen går, kan du vere med i TPT
-Dersom du har lyst til å gå tur i lag med andre TPT-damer så bestem eit mål og kall inn!

Ei "taus" må kanskje også definerast: det er (i dette tilfellet) ein person av hokjønn. Alder og sivilstatus held vi utanfor her.

Til slutt vil eg gjere merksam på at ordet "taus" ikkje har noko som helst med å vere "taus" å gjere, om du ikkje har sans for ironi....!

Tvert imot: vi aukar oksygenopptaket bevisst (eller ubevisst) ved å snakke masse i motbakkane. Når du kan gå på Skårhaugnakken og snakke samtidig heilt til du er oppe, er du i god form! - og du har ikkje minst skaffa deg ein solid status i TPT.